［打工仔小薯分享：WHY返工？］

突然間有啲感觸。

對於番工呢一回事，其實兩年前初初做呢份工時都有係咁反省「到底我番工係為左咩？」果陣時我經歷過一段時間，每朝起身就問：自己點解要番工？點解要番呢份工？點解要自己攞苦嚟辛？

最開頭我得到既答案係：$我需要賺錢。呢份工俾到我一個合格又穩定既賺錢機會，而且周不時有特別既花紅同禮物🎁，緊係覺得幾唔錯啦～再加埋福利都唔錯，有齊晒醫療保險牙保險呢堆野，又有早午餐提供，一年都慳返唔少架。

「哇，你咁好既package，都想走？」

係啊，果時覺得份工最唔好既一個位就係：困身，想辭職去做YouTuber+搞生意仔+做藝人/小畫家。我覺得自己係「藝術人」，而依家每日番工對住一堆數據，對住啲唔想深入了解既條文或者係填報說明，真係內心好痛苦😥，每日都係咁質疑自己。再加上，我覺得自己係俾屋企人同現實打敗左既「藝術人才」，於是我每日都「三醒吾身」，日日頭頂都有舊灰雲係咁捲捲捲，做咩事都唔太提得起勁。

好了，話雖如此，我繼續留左係間公司，我既念頭轉化左。就算無辭職，因為我依家熟練程度高左，所以做依家既野對我嚟講唔難，仲有能力提升效率添！變相我多番啲私人時間，可以用黎做我想做既野（做YouTuber、做生意、玩興趣）🙂

於是乎，到左依家呢個時候，我都keep住留返係度，而我既業餘時間真係多左，只不過係我一定要調整自己心態，令自己保持活力面對番工同收工時間既生活。

收工後時間多左，可以做既事多左，例如今年一月初開始每日做運動、到每日記得飲多少少水、仲有之前既每日日記等，各樣既事都係要用黎平衡生活狀態。我認為，番工賺錢只係一日入面既一小部份，絕對唔可以俾佢佔據你整個身心時間，影響自己心情不突止，影響埋自己身體就絕對唔好。

係公司入面，上司、同事對你點都好，我依家會保持中立，人地心情唔好話多我兩句，我都要保持冷靜，唔好擺入心。有時佢都唔想要同你鬧交既，純粹係心情唔舒暢，搞到佢易怒，咁岩你又做唔岩佢心水既野，唯有俾人地鬧下，當幫左佢🤭。所以話，番工既心態真係好重要，我當然唔係叫你做野hea住咁博俾人鬧啦，只係話若然咁岩俾人話果時明顯感覺到鬧你果位既心情唔好，咁就唯有「睇開啲」啦～～～

相信我並唔孤單。🥸